Деканот на ФТБЛ, проф. д-р Никола Димитров, и професорите д-р Златко Јаковлев,  д-р Цане Котески, д-р Мимоза Серафимова и д-р Марија Магдинчева-Шопова на 23 и 24 ноември учествуваа на Меѓународната научна конференција „Geography, regional development and tourism“ во Шумен, Република Бугарија. Деканот и професорите од Факултетот за туризам и бизнис логистика на Конференцијата се претставија со свои научни трудови. 

Конференцијата беше во организација на Шуменски универзитет „Епископ Константин Преславски“, Катедра за географија, регионален развој и туризам. 

На Меѓународната конференција учествуваа околу 60 научни работници од пет држави. На Конференцијата се воспоставени повеќе контакти за соработка со неколку странски универзитети и факултети.  Факултативно беа посетени: Мадарско плато со познатиот Мадарски конник (заштитен од УНЕСКО како светско културно наследство) и Шуменско плато (природен парк со познатиот споменик „1300 години Бугарска држава“).