По повод Светскиот ден на туризмот - 27 септември, деканката на Факултет за туризам и бизнис логистика, проф. д-р Татјана Бошков, доби Признание за особен придонес во туризмот од страна на државниот секретар на Министерството за економија, м-р Размена Чекиќ-Дуровиќ.

„Туризмот има клучна улога во економиите, а Светскиот ден на туризмот е воспоставен со цел подигање на свеста и важноста на туризмот и неговите општествени, културни, политички и економски вредности. Ако пораката на UNWTO за Светскиот ден на туризмот во 2022 беше ‛rethinking tourism‛, за 2023 г. e ‛tourism&green investments‛. На овој Светски ден на туризмот ја препознаваме виталната потреба од зелени инвестиции во овој сектор. Истиот е повик за акција до меѓународната заедница, владите, мултилатералните финансиски институции, развојните партнери и инвеститорите од приватниот сектор да се обединат околу нова стратегија за инвестиции во туризмот. Сето ова во насока на искористување на обновливите извори на енергија, заштита на биодиверзитетот, еколошка рамнотежа на сите дестинации,а секако со ефект на обезбедување работни места, поддршка за локалните бизниси и индустрии.
Имено, во оваа година се нагласува потребата од повеќе и подобро насочени инвестиции за луѓето, за планетата и за просперитетот. Сега е време за нови и иновативни решенија.
Сите заедно, вклучувајќи нѐ и нас како образовна институција треба да дејствуваме во насока на искористување на целосниот потенцијал на одржливиот туризам што е предуслов за наша подобра иднина. Среќен Светски ден на туризмот!” – изјави деканката проф. д-р Татјана Бошков.
Министерството за економија традиционално ја одржува оваа манифестација на која им се доделуваат признанија на најуспешните во оваа област.