На ден 15.5.2023 година дел од студентите од прва и од трета година од Факултетот за туризам и бизнис логистика при Универзитетот „Гоце Делчев“ во Штип (Наставен центар во Скопје) ја посетија американската компанија „Кемет електроникс“ која се наоѓа во Технолошко-индустриската развојна зона „Скопје 1“. Оваа компанија е производител на кондензатори за автомобилската индустрија и за различни индустриски апликации.

Студентите, заедно со директорот на Дирекцијата за технолошки индустриски развојни зони, Јован Деспотовски, и Беба Бајрамовска како дел од тимот на ТИРЗ, имаа можност да ги следат производните процеси, но и сите алатки и техники кои менаџментот ги користи за унапредување на процесите, со цел креирање производи со супериорни вредности.
Од Факултетот изразуваат благодарност до менаџментот на „Кемет електроникс“ и до Дирекцијата за технолошки индустриски развојни зони за поддршката и за градењето партнерски односи со високообразовните институции, со цел креирање компетентен работен потенцијал кој полесно ќе се интегрира во реалните системи и ќе одговори на предизвиците што ги носи иднината.
Посетата на компанијата е во согласност со Наставната програма по предметите Системи за квалитет и стандарди, Примена на методи и техники во системи и Основи на менаџмент, а се реализира под менторство на проф. д-р Елизабета Митрева.